¡Asturies en pie! desixe la llibertá d’Isma y Miguel nel conciertu de Gatillazo


Militantes de ¡Asturies en Pie! desixeron la llibertá d’Isma y Miguel, que continúen en prisión dende la so detención por participar na manifestación del 22 de marzu en Madrid, subiendo al escenariu con cartelos col testu: “¡Isma y Miguel, llibertá!.
(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU).
¡LLIBERTÁ DARRÉU PA ISMA Y MIGUEL!
¡LLIBERTÁ PA LA XENTE DETENÍA POR LLUCHAR! 
¡XUSTICIA SOCIAL!

Un militante de la CSI imputáu por un delitu de daños por facer pintaes escontra’l PP. Escontra’l paru y escontra la emigración llaboral forzosa



Comunicáu d'Asturies en pie:

Un militante de la Corriente Sindical d’Izquierda y miembru de ¡Asturies en Pie!, foi citáu nel cuartel de la Guardia Civil de Villaviciosa, por una denuncia presentada contra él pol alcalde y la policía municipal del conceyu, que lu acusaben d'un delitu eleutoral por realizar pintaes a la escontra'l PP, a la escontra'l paru y a la escontra la emigración llaboral, n'espacios empobinaos al allugamientu de propaganda eleutoral.

Nesta comparecencia, a la que'l denunciáu allegó acompañáu d'una abogada de ¡Asturies en Pie!, los axentes de la Guardia Civil comunicáron-y la so situación de deteníu y la so imputación nun delitu de daños pola realización de pintaes, por valor de 1.100 €.

El militante de la CSI acoyóse al so derechu a nun declarar y darréu foi puestu en llibertá.

Les pintaes qu'apaecieron nestos espacios eleutorales denunciaben el calter dictatorial de PP y convidaben a la llucha a la escontra'l paru y la forzosa emigración llaboral a la que'l PP conderga a miles d'asturianos y asturianes (“Nun emigres, llucha”...).

Esti militante de la CSI ye un trabayador precariu, que tamién ta siendo procesáu pola so participación nes lluches vecinales de Llugones a la escontra la implantación de la zona azul y ye solidariu con munches de les lluches obreres y sociales que tán teniendo llugar n’Asturies.

Pa ¡Asturies en Pie!, l'alcalde Villaviciosa tendría de dexar d'escorrer a los sos ciudadanos y ciudadanes del so conceyu y empezar a señalar y denunciar los pergraves casos de corrupción polos qu'el so propiu partíu, el PP, ta siendo investigáu y condergáu.


(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU).