Los prósimos díis 6 y 7 de setiembre tendrán llugar los II Alcuentros alternativos y populares de Bimenes, y dende Asturies en pie queremos invitaros a que participéis a tolos coleutivos colos que compartimos la llucha díi ente díi, y a aquellos otros qu’aún nun conocemos, pareciendomos que ye una mui bona ocasión pa facelo.
Los Alcuentros alternativos y populares de Bimenes ñacen l’añu pasáu del enfotu de los sindicatos y coleutivos sociales que formamos Asturies en pie, de facer unes xornaes nun sólo reivindicatives y solidaries sinon tamién folixeres. Unes xornaes onde la xente que peleamos xunta tol añu y xente qu’entovía nun mos conocemos pudieremos compartir l’espacíu, les esperiencies, les preocupaciones,...nun ambiente relaxáu y llúdicu. Y a la vez sacar dalgo de dineru pa la caxa de resistencia, ya que son munches les lluches y ye muncha la represión. Multes, peticiones de cárcel,...ye lo cotidiano. Pero nin con eses van facer que dexemos de lluchar. Y pa ello la solidaridá ye perimportante, y la caxa resistencia ún de los sos pegoyos. La esperiencia del añu pasáu foi per bona, y dende equí dar les gracies a tola xente que lo fizo posible, y esti añu repetimos y ampliamos actividaes. Con esi enfotu de compartir y conocemos toos/es, invitamosvos a participar nos II Alcuentros. Podéis pasar el díi en comuña, y tolos coleutivos que queráis poner la vuestra mesa con materiales, traer la vuesa pancarta,...
Nun queremos un díi d’Asturies que nun represente lo que de verdá ta pasando y ye Asturies, y por eso vos invitamos a participar y formar parte de los II Alcuentros alternativos y populares de Bimenes, los díis 6 y 7 de setiembre. Porque ente toes/os facemos camín.
Participa y difunde!!
