La solidaridá, la música y la folixa danse la mano en Bimenes

Como ya sabéis esti añu celebrense los II Alcuentros alternativos y populares de Bimenes.
Como l'añu pasáu estos alcuentros nacen del enfotu de los sindicatos alternativos y coleutivos sociales que formamos Asturies en pie, de facer unes xornaes nun sólo reivindicatives y solidaries sinon tamién folixeres. Unes xornaes onde la xente que peleamos xunta tol añu y xente qu’entovía nun mos conocemos pudieremos compartir l’espacíu, les esperiencies, les preocupaciones,...nun ambiente relaxáu y llúdicu. Y a la vez sacar dalgo de dineru pa la caxa de resistencia, ya que son munches les lluches y ye muncha la represión. Multes, peticiones de cárcel,...ye lo cotidiano. Pero nin con eses van facer que dexemos de lluchar. Y pa ello la solidaridá ye perimportante, y la caxa resistencia ún de los sos pegoyos.
Y por eso, porque lo importante ye la solidaridá, los alcuentros tan montaos con muncho esfuerzu y compromisu por parte la xente que los fae posible. Ensin patrocinaores, ensin casi presupuestu. N'esti sen agradecer a tola xente que trabaya pa facer posible estes xornaes: dende la xente que monta les cosines, que se preocupa de los detalles, qu'intenta té tou preparao pa esos díis, como a la xente que cola so actuación van facemos unos alcuentros perguapos ya interesantes, a los coleutivos que participaran, a les empreses que compatiran con nos la so esperiencia. Y ente esa xente a tolos/les músicos qu'entienden el motivu de los alcuentros y participen col so esfuerzu y el so trabayu. Munches gracies a Arma X, a la Tarrancha, a Skama la Rede, a Dani Anstailo, Juanillo 2.0, y a Enrique Villarreal (El Drogas), qu'ensin pensaselo dos veces decidió venir a solidarizase con tola xente represaliao. Primero tocara unes canciones del so discu sobre la memoria hestórica La tierra está sorda, nel homenaxe a les persones lluchaores y asesinaes que tendrá llugar nel Pozu Funeres, y llueu, nel conciertu, podremos disfrutar de la so música y la de la so banda Des memoria band.
Qu'esti exemplu de solidaridá sirva pa crear llazos que la represión nun puea frayar.
Vemonos en Bimenes el 6 y 7 setiembre.
Puxa la llucha de la clase obrera.